Classic
٥ س ·
- قوليلي الحق يا فايزة، من غير كدب ، إنتِ جيتي النهاردة ليه ؟
= علشان أديلك اللي إنت عايزه، أنا جيت قبل كدا مرة و طردتني لأني ما رضيتش إنك تقربلي ، المرة دي جيت و ناوية أخليك ما تطردنيش
- و إيه اللي خلاكي تغيري رأيك ؟
= الناس، الناس اللي زيك ما حدش رضي يقبلني بشرفي و كرامتي كل طريق مشيت فيه لقيته مسدود، مسدود بالسفالة و الإنحطاط و الأخلاق البطالة، فقررت أنا كمان أكون سافلة و مُنحطة علشان الطريق ينفتح قُدامي
- إنتِ مُقتنعة باللي إنتِ بتعمليه ؟
= أنا حاولت كتير، كملت تعليمي علشان أهرب من جو البيت الفاسد و إشتغلت علشان ما أحتاجش لحد، سافرت و كلي أمل إني ألاقي جو أنضف من جو البيت اللي كنت عايشة فيه، حاوطوني الديابة من كل ناحية برا المدرسة الأجزجي و الهدايا من كل صنف والراجل الغني بفلوسه وعزبه حتى المدرسة اللي كنت عايشة فيها شفت فيها العجب و لما ما رضيتش أجاريهم إتقلبوا عليّا، ملوا البلد عني بالإشاعات لغاية ما حققوا معايا و طبعاً شهدوا كلهم ضدي
لجأت لإنسان كان له مَعَّزة بقلبي قُلت دا اللي هيحميني منهم لأنه مختلف عنهم، طلع جبان زيهم و خيب أملي فيه، بعدت عن الناس الناس ما سابتنيش في حالي، إختلطت بالناس حاولوا يحطموني كان لازم أستسلم من زمان علشان أستريح وأريح الناس
- غريبة، لكن إنتِ ما جاوبتيش على سؤالي، إنتِ مُقتنعة باللي بتعمليه؟
= لأ، نفسي ضميري يموت علشان أستريح
- لازم تعرفي إن مش كل واحدة تقدر تمشي في السكة دي، إنتِ جيتي هنا وإنتِ مش مقتنعة باللي بتعمليه جيتي غصب عنك لأن الناس دفعوكي للطريق دا و كانت النتيجة إنك إتلخمتي و إترعشتي و بقيتي زي لوح التلج و كان ممكن تخسري كل حاجة لحظة واحدة و ترجعي تندمي عاللي عملتيه طول عمرك
= دا الحل الوحيد اللي لقيته قدامي
- أبداً تخليكي زي ما انتِ، خليكي في الطريق اللي كنتي ماشية فيه طول عمرك
= و أرجع أقاسي و أتعذب من شرور الناس !
- مهما إتعذبتي هيكون عذابك أرحم من اللي هتشوفيه لو مشيتي في طريق تاني
= أنا مقدرة كل كلمة من اللي بتقوله إنما أعمل و أعيش إزاي مع الناس ؟
- ما تعمليش حاجة ضد مبادئك ضد طبيعتك ما تعمليش حاجة ترجعي تندمي عليها ، أنا أكبر منك يا فايزة وأعرف الدنيا أكتر منك، ما تفتكريش إن أنا سافل ، أنا سافل بس مع السفلة لكن إنتِ حاجة تانية إنتِ رقيقة و كريمة و طاهرة خليكي زي ما إنتِ .
فيلم الطريق المسدود
1958