ود ليش؟؟ جواب مواطن لسؤال وطن
أمس، الساعة 10:51 ص ·
سوالف العم شنيشل
سكسونيا يالكاظمي ؟ لو (عراق سونيا)
- من جانبهم غفور رحيم – ومن جانبنا شديد العقاب
- بطل (الجام خانة) مثل الحايج الجذاب
- لازم نرضي جماعة الحضن
- بعد شيريد تشرينو ؟
لقطة اولى : في العصور المظلمة ،ساد في أوربا ماسمي ب(قانون سكسونيا ) وينص على ان طبقة (النبلاء)اذا ارتكب أحدهم جرماً ،يعاقب بجلد ظله ، فيما يعاقب بالموت ،من ارتكب الجريمة ذاتها اذا كان من الفقراء .
الكاظمي يفتر ( داخله خاركَه ) رايح جاي ، والكاميرات تفتر وياه ، والحسابات بلاحساب ،تنشر وتنشر وتنشر فكل كلمة (داخلية)تتسرب الها بالاول ، وكل شي تمام ، بس ترى الحايج الجذاب ،هم ضحك على الناس ، واوهمهم انه يحوك ثوب للملك ماشف مثله العالم كله ،تاليها طلع الملك عريان والشعب يصفكَ – عاش الملك - .
اجا ابو الكواظم للبصرة ، وكشّر واستنفر ،وكال اليوم اسويها ظلمة ، وصارت الحملات على جمع السلاح المنفلت وغير المنفلت ، وراها طار للحبايب في الاقليم وضحكته اوسع من ساحة الفردوس ،ها خوية شتردون – بخدمتكم :وهاي فد 575 مليار- على ذمة الاخبار- مصروف جيب للفلاحين هناك ، بس شسلموا وشباعوا – محد يدري ؟؟
وهاي شكم ألف وظيفة للمناطق المحررة ،يستاهلون ،حتى لو بيهم دواعش ، وشجم ألف برميل للاردن الشقيق ، وشنو المشكلة اذا كان كل من يعادي العراق ،يسكن بالاردن ورواتبهم توصل الهم كاملة ، حتى لو كانوا بعشرات ومئات الالاف ،هذول خدموا الدولة ، وعود اذا واحد منهم مرتكب كم جريمة بحق العراقيين ،مو مشكلة نطبق عليه قانون (عراق سونيا) نرش شوية مي على خياله – والله وياه وياخذ راتبه على آخر فلس .
الجمعة أغسطس 07, 2015 12:58 pm